Ŝtuparo ekstera

Ni kune grimpu la novajn ŝtupojn de Greziljono !

La administrantoj de kastelo Greziljono plezure anoncas la tujan ekkonstruadon de nova ŝtuparo.

Post la hejtado, la necesejaj tubaroj, la kahelado de la manĝilejo… tiu ĉi ŝtuparo fariĝis la prioritata celo. Fakte, donante pli bonan sekurecon kaj alireblecon, ĝi ebligos daŭre uzi la jamajn ĉambrojn de la dua etaĝo aldonante pliajn dulitajn, tiel kreskigante la gastigeblecon de la kastelo.

Tiuj ĉi konstrulaboroj estos tre gravaj kaj finance kaj konsiderante la necesan strebadon de la volontuloj, kiuj preparos kaj sekvos la konstruadon. Tiun ĉi konstruadon pravigas ĉefe du kialoj :

  • pluigi la nunan uzadon de la kastelo pli konforme al aktualaj normoj pri sekureco kaj alirebleco,
  • prepari supozatan disvolviĝon de ĝia uzado kun iom-post-ioma kreskigo de la gastig-ebleco kaj -kvalito.



Ni ege dankas ĉiujn volontulojn, kiuj preparas tiun ĉi konstruadon de multaj monatoj kaj ankaŭ vin ni dankas, vin ĉiujn, kiuj povas helpi nin :

  • partoprenante aktivaĵojn de la Kulturdomo de Esperanto, kies programo troviĝas ĉi tie,
  • aliĝante al la volontuloj, kiuj laŭokaze aŭ regule helpas, dum laborsemajnfinoj aŭ agadoj proponataj al la publiko,
  • kunklopodante malfermi la kastelon al aliaj aktivaĵoj, atentante ĉirkaŭ vi asociojn aŭ profesiulojn, kies agado kongruas kun la kastela celo, kaj tiel kontribui ĝian prosperon,
  • donacante monon por partopreni la financadon de la konstruado. La kosto de la entuta konstruado estas tioma, ke ĝi postulos plurjaran amortizadon. Donacojn oni sendu al : Kulturdomo de Esperanto, kastelo Grésillon, Saint-Martin d’Arcé, 49150 Baugé en Anjou, Francio. Por ĝiroj konsultu ĉi tie.



Antaŭan dankon !

La Komitato, je 2013-nov-08

Jen fotoj laŭ datoj antaŭ, dum kaj post la laboroj.

2013-nov-11
2013-nov-12
2013-nov-13
2013-nov-13
2013-nov-29
2013-nov-29
2013-dec-12
2013-dec-12
2013-dec-13

Reiri supren